- بو قیز گونده اوچ چؤرک یاریم یه­ییر، اوچ کلف یاریم دا یون اگیریر. ایندی بو گون اوچ چؤرک یه­ییب، یاریسی چاتماییب اونون قارنی دویمایاندا بئله ائدیر.

قیز تاجیرین چوخ خوشونا گلیر. فیکیرله­شیر کی، قیزی آلسام یاخشی اولار. من تجارته گئدنده ائوده یون اگیرر، ساتیب بیر آز دا اورادان قازانارام.

تاجیر قیزین قونشوسونا دئییر:

- گلسنه او قیزی منه آلاسان؟

قونشو تاجیرین سؤزونو گئدیب قیزا دانیشیر. قیز دئییر: شرطیم بو دور کی، گرک منی چوخ ایشلتمه­سین، اگر ایشلتسه، اوندا دونوب قورباغا اولاجاغام.

قونشو قیزین بو سؤزلری­نی گلیب تاجیره سؤیله­ییر.

- تاجیر ئوز – ئوزونه دئییر: « هئچ آدام دا دونوب قورباغا اولار؟ یقین منی سیناماق ایسته­ییر». اودور کی، قیزین تکلیفینه راضی اولور. همین گونون صاباحی­سی تاجیر توی ائله­ییب قیزی آلیر. اونلار بیر نئچه وقت بیر یئرده شاد، خرم یاشاییرلار. گونلرین بیرینده تاجیر آروادینا دئدی:

- آرواد، سنه بیر ائو دولسو یون قویوب گئدیرم سوداگرلیگه، من گلنه کیمی اونو اگیررسن.

آرواد دئدی:

- بس سن نه وقت گله­جکسن؟

تاجیر دئدی:

- باخ، گؤرورسنمی، ائوی­میزین دالینداکی او تپه گؤیه­رنده گله­جگم.

تاجیر آروادی ایله حلال­لاشدی، دوه­لری­نی یوکله­ییب یولا دوشدی. تاجیر گئدندن سونرا آرواد گؤردی کی، بیر ائو دولوسو یونی ئولنه­جن اگیریب قورتارا بیلمیه­جک. اودور کی، هر گون اوچ چؤرک یاریم یه­ییب بیر آز دا یون اگیریر، گونی­نی کئچیریردی. آرواد بیر گون باخیب گؤردی کی، ائوین دالیندا کی تپه گؤیه­ریب، یون دا اگیریلیب قورتارماییب. جانینا قورخو دوشدی کی، اری گلنده نه جواب وئره­جک. ها چالیشدیسا گونده اوچ کلف یاریمدان آرتیق یون اگیره بیلمه­دی. باشی ایشه او قدر قاریشدی کی، چورک بیشیرمگه وقت تاپمادی. او، خمیر یوغوروب، هر چیگنینه بیر کونده قویدی، الینده یون دامین اوستونه چیخدی، هارای چکدی:

- گؤی تپه­جیک گؤیردی، اریم منی دویردی!

بو جور آه – اوف ائلیه – ائلیه چیگنینده­کی کونده­لرین هره­سیندن بیر دیشلک آلیردی.

بو وقت جزن پادشاهی­نین اوغلونی بوردان آپاریرلارمیش.

اونون بوغازیندا نئچه ایل ایدی کی، سوموک قالمیشدی. نطقی تمام توتولموشدی. هئچ بیر حکیم اونو ساغالدا بیلمیردی. اودور کی، هر یئری گزیریردیلر کی، بلکه اونا بیر علاج تاپیلا.

بیردن اوغلانین گؤزی دامین اوستونده کی آروادا ساتاشدی. اوغلان نئچه ایل ایدی کی، غم دریاسینا غرق اولموشدی. همیشه بی کئف اولوب اوزو گولمزدی. آروادین بو حرکتی اونا گولمه­لی گؤروندی. او، ئوزونو ساخلایا بیلمه­دی، شاققا چکیب برکدن گولدی، بیردن سوموک بوغازیندان چیخیب یئره دوشدی. اوغلان باشلادی او ساهات دانیشماغا. وزیر – وکیل بو ایشه سئوینیب بؤیوک شادلیق ائله­دیلر. شاهزاده دئدی:

- جماعت، اگر بو آرواد منی گولدورمه­سیدی، سوموک بوغازیمدان چیخمازدی. کیم منی ایسته­ییرسه اونا خلعت وئرسین.

جماعت خلعت وئرمک ایسته­ینده آرواد دئدی:

- ای اوغلان، من سندن خلعت ایسته­میرم، اَریم گئدنده منه بیر دام دولوسو یون قویوب گئدیب. ئوزی ده تاپشیریب کی، من گلنه کیمی اونو اگیررسن. ایندی کی، منه یاخشی­لیق ائله­مک ایسته­ییرسن، اوندا آداملارینا تاپشیر منیم یونومو اگیرسینلر.

شاهزاده او ساهات امر ائله­دی، بیر گونون ایچری­سینده بونو اگیریب قورتاردیلار. آرادان بیر – ایکی گون کئچدی، تاجیر گلیب گؤردی کی، بیر دام دولوسو یونون هامی­سی اگریلیب قورتاریب. تاجیر دئدی:

- آی آرواد، سن نه قوچاق  ایمیش­سن. یاخشی اولدی، ائله من هر سفره گئدنده سن بو قدر یون اگیررسن، وار – دولتی­میزی ییغیب – ییغیشدیرماق اولماز.

آرواد باشا دوشدی کی، اری بیر ده سفره گئتسه یئنه بیر دام دولوسو یون قویوب گئده­جک. او دا یونی اگیریب قورتارا بیلمیه­جک. بوتون کلکلرینی اوستو آچیلاجاق. اودور کی، اَری ائودن چیخاندا بیر قورباغا توتوب ائوه بوراخدی. آخشام اَری ائوه گلنده آرواد قورباغایا باخیب دئدی:

- بوی، آی خالا، سن بیزه خوش گلیبسن، صفا گتیریبسن، سنه قوربان اولوم، قورو یئرده نیه گزیرسن، گل دوشه­گین اوستونده اوتور.

کیشی بو احوالاتی گؤروب لاپ معطل قالی، دیدی:

- آرواد، سن دلی اولوب­سان، نه­دیر، قورباغایا نیه خالا دئییرسن؟

آرواد دئدی:

- آ کیشی، دلی نیه اولورام. بو منیم اصل دوغماجا خالامدیر. بیزیم جنسی­میز بئله­دیر. اولجه قشنگ اولوروق، ائله کی، چوخ ایشله­دیک، اوندا دونوب اولوروق قورباغا. منیم بو خالامین اری ده تاجیر ایدی. او همیشه سوداگرلیگه گئدنده یازیغا او قدر یون اگیرتدیریب کی، آخیردا یازیق خالام دونوب اولوب قورباغا.

کیشی دئدی:

- آرواد، سنده­می چوخ ایشله­سن قورباغایا دونرسن؟

آرواد دئدی:

- بس نه، بیزیم جنسی­میز بیردیر.

کیشی دئدی:

- آرواد، قادان آلیم، داها بوندان سونرا نه ایشله، نه ده قورباغایا دون، ئوزوم قازانارام، دولاناریق.

گونلر ئوتوب، آیلار کئچیر. تاجیر یئنه سوداگرلیگه گئدیر. بو دفعه آروادا هئچ بیر ایش تاپشیرمیر. تاجیر گئدنده آرواد حامله ایمیش، ئوزی ده دئییر کی، آرواد، بازاریم یاخشی اولسا لاپ تئز قاییداجاغام.

آمما ایش ترسینه گتیریر. آرواد ایکی آی، اوچ آی، یئددی آی، گؤزله­ییر، تاجیردن هئچ بیر سراغ چیخمیر. آخیردا آرواد اَری­نین آتینا مینیب اونو آختارماغا گئدیر. آز، گئدیر، چوخ دایانیر، داغلار آشیر، دره­لر کئچیر، گئدیب چیخیر بیر مئشه­یه. دئمه بو وقت آروادین وقتی تامام ایمیش، او، یاواشجا آتدان یئره اَنیر، او ساهات بیر اوشاغی اولور. اوشاغی لچگینه بوکوب شله­له­ییر دالینا، سیچراییب مینیر یئنه آتینا، باشلاییر یول گئتمگه. دئمه بو وقت پادشاه آداملاری ایله اووا چیخیب­میش، آروادین ساکیت­جه دوغوب آتا میندیگی­نی گوروبموش. آرواد گئدندن سونرا پادشاه ئوز – ئوزونه دئییر:

- « بئله ده ایش اولار؟ منیم آروادیمین دوغماقینا هله قیرخ گون قالمیش اَلینی آغدان قارایا وورمور، ایپک یورغان – دوشگین ایچینده یاتیب گاه هیققیلداییر، گاه زاریلداییر، نوکر قاراواش اونون باشینا فیرلانا – فیرلانا قالیر. اوشاغی اولاندان قیرخ گون سونرا دا تازا بیر هنگامه قوپاردیر کی، آی ئولدوم، آی بورادا اوتورمایین، آی بورادا دورمایین، آی یئمیرم، آی ایچمیرم. داها لاپ گونوموزو قارا ائله­ییر. آمما بو آرواد هئچ بئله ائله­مه­دی. یقین منیم آروادیم حیله ائله­ییر. گرک گئدن کیمی اونون باشینا بیر اویون آچیم کی، هئچ عؤمرونده گؤرمه­میش اولسون».

پادشاه اوودا چوخلی قوشدان، حیواندان ووروب، قاییتدی ائوه. مئشه­ده گؤردیگی بوتون احوالاتی آروادینا سؤیله­ییب اونو دانلادی کی، سن ناز و غمزه ائله­ییب، منی آلدادیرسان.

آرواد نه قدر ائله­دیسه کیشی­نی ایناندیرا بیلمه­دی.

آخیردا دئدی:

- یاخشی من سنه گؤستره­رم کی، بو نیه بئله اولور.

ایش بئله گتیردی کی، پادشاه اوزاق بیر سفره گئده­سی اولدی. پادشاهین بیر باغی وار ایدی. دونیادا هر جور میوه، گول – چیچک دئسن بورادا تاپیلاردی. پادشاه گئدنده باغبانی­نی یانینا چاغیریب دئدی:

- باغبان! باغ امانتدی ها! باغا یاخشی باخ. آغاجلاری وقتینده سووار. قویما یانیب ترک اولسون.

باغبان ادب و ارکانلا باش اگیب گئتدی. بو طرفدن ده پادشاه یاراقلاندی، بیر خیلی ده قوشون گؤتوروب یولا دوشدی.

پادشاه گئدن کیمی آروادی باغبانی چاغیرتدیریب دئدی:

- باغبان، اَریم گلنه کیمی آغاجلارا بیر دامجی دا سو وئرمزسن.

باغبان دئدی:

- خانیم، اوندا آغاجلار قورویار، من پادشاها نه جواب وئره­رم.

آرواد دئدی:

- سنین ایشین یوخدور، اونون جوابینی من وئره­رم. سنه نه دئییرم اونو ائله.

باغبان علاج­سیز قالیب، آغاجلاری سووارمادی. یایین ایستی­سینده باغ یانیب تمام ترک اولدی. آرادان خیلی کئچمیش پادشاه سفردن قاییدیب گلدی، گؤردی کی، باغ قورویوب، بیر چنگه اوت دا قالماییب. او ساهات امر ائدیب باغبانی گتیرتدی دئدی:

- کیشی، من سنه دئمه­دیمی باغا یاخشی باخ؟ بو نه ایشدیر، آغاجلار هامیسی قورویوب ترک اولوب. ایندی سنین درینه سامان تپدیریم سن ده باخ.

باغبان شاها باش اندیریب دئدی:

- قبله عالم، منیم هئچ بیر تقصیریم یوخدور، بو ایشلری ائله­ین ئوز آروادیندیر. چاغیریب خبر آل، هامیسینی دئسین.

پادشاه او ساهات آروادینی چاغیریب دئدی:

- بو نه احوالاتدیر، باغی نیه قورودوبسان؟

آرواد دئدی:

- آ کیشی، بورادا نه بؤیوک ایش وار کی، باغبانا من تاپشیرمیشام. او دا آغاجلارا سو وئرمه­ییب، اونا گؤره ده باغ قورویوب.

پادشاه دئدی:

- آرواد، سن دلی اولوب­سان نه­دیر، سوسوز دا آغاج بیتر؟

آرواد دئدی:

- مئشه­ده کی آغاجلاری کیم سولاییر، بس اونلار نیه قورومور؟

پادشاه دئدی:

- آی آرواد، آخی مئشه­ده کی آغاجلار ائله ئورگه­نیبلر، اونا گؤره ده قورومورلار.

آرواد دئدی:

من ائله سندن بو سؤزی ائشیتمک ایسته­ییردیم. یادیندادیرمی مئشه ده بیر آروادین سس سیز – کوی سیز دوغوب سونرا دا آتا مینیب گئتدیگینی گؤرموشدون، گلیب منی دانلادین کی، بس سن نیه ائله دگیل­سن. من نه قدر دئدیم کی، آ کیشی، او آرواد ائله تربیه آلیب، من بئله، سن سؤزومه فیکر وئرمه­دین. ایندی گؤردونمی سنین باغینداکی آغاجلاری سووارمایندا قورویور، آمما مئشه­ده کی آغاجلاری هئچ کیم سوواترماسا دا ئوزلری بویویوب قول – بوداق آتیر؟ ایندی بیل کی، من سنین باغینداکی آغاجلار کیمی تربیه آلمیشام او آرواد دا مئشه­ده کی آغاجلار کیمی.

پادشاه گؤدی کی، آرواد اونو یامان یئره یاخالاییب، اودور کی، بیر سؤز دئمه­ییب باغبانی آزاد ائله­دی.

بونلار بورادا قالسین، گؤرک تاجیرین آروادی نئجه اولدی؟

آرواد چوخ یول گئدندن سونرا گلیب بیر شهره چاتدی. سراغلاشیب ئورگندی کی، اَری­نین دوه­لری پادشاهین قوروغونا گیردیگی اوچون تاجیری توتوب زیندانا سالیب­لار. آرواد نه قدر ائله­دیسه اونو نه پادشاهین، نه ده اَری­نین یانینا بوراخدیلار.

آخیردا آرواد فیکیرلشدی کی، دئیه­سن بو پادشاهین هر ایشی ترسینه­دیر. من ایسته­دیم یاخشی­لیقلا اونون یانینا گئدیم، بوراخمادیلار. ایندی کی، بئله اولدی آتیمی سالاجاغام قوروغا، قوی گلیب منی توتوب آپارسینلار پادشاهین یانینا. هئچ اولماسا اوردا سؤزومی دئیه­رم. آرواد آتینی ووردی قوروغون ایچینه، او طرفه – بو طرفه، او قدر چاپدی کی، قوروغو تامام آلت – اوست ائله­دی. قوروقچولار آروادی گؤرن کیمی توتوب گتیردیلر پادشاهین یانینا، احوالاتی اونا اولدوغو کیمی دانیشدیلار.

پادشاه دئدی:

- آرواد، سن نه جرئتله منیم قوروغوما آت سالیب­سان؟

آرواد دئدی:

- ای پادشاه، منیم اَریمی توتوب سالیب­سان زیندانا نه قدر ائله­دیم کی، سنین یانینا گلیب دردیمی دئیم، بوراخمادیلار.

من گؤردوم کی، سنین تورپاغیندا دوزلوکله ایش گؤمک اولمور، اودور کی، باشلادیم پیس­لیک ائله­مگه، ئوز – ئوزومه دئدیم کی، قوی قوروغا گیریم، یا منی توتوب پادشاهین یانینا آپارارلار، یا دا زیندانا، اَریمین یانینا. ایندی دوغرودان دا منی سنین یانینا گتیردیلر.

پادشاه برک غضب­لندی. امر ائله­دی کی، بونو دا آپاریب سالین زیندانا. آروادی آپارماق ایسته­ینده دئدی:

- ای پادشاه، بیر آدام سنی ئولومدن قورتارسا، اونا نه ائله­یرسن؟

- من ده، اونو ئولومدن قورتارارام.

آرواد دئدی:

- ایندی کی، بئله­دیر، بس نیه منی زیندانا سالیرسان؟ من همان آروادام کی، سنین بوغازیندا قالمیش سوموک منه باخیب گولندن سونرا بوغزیندان دوشدی، ئولومدن قورتاردین.

پادشاه بو سؤزدن سونرا آروادی تانیدی. اونون اَرینی ده زینداندان آزاد ائله­دی.

تاجیر آروادینی گؤرندن سونرا دئدی:

- آرواد، سن هارا، بورا هارا؟

آرواد دئدی:

- آ کیشی، گل گئده­ک ائویمیزه، یولدا هامی­سینی سؤیله­رم.

اَر – آرواد دوشدیلر یولا. آرواد باشینا گلن احوالاتین هامی­سینی اَرینه نقل ائله­دی. کیشی آروادینا «آفرین» دئییب، ائولرینه گلدیلر. هر ایکیسی گون کئچیریب عمر سورمگه باشلادیلار.